خليك في حالك 

خليك في حالك 

وسيب الناس كمان في حالها .. !

بلاش تخلي كلامك زي الرصاص يقتل الرضي في قلوبهم 

أو يصيع سعادتهم :ـ

– إللى عايش في شقة صغيرة وعلي اد حالة هو مبسوط بيها وَراضي بحياته ، مش محتاج من حضرتك لما تدخل تزوره تأنبة ولا تعايرة أنه عايش فيها ، وَتخليه يكرهها !!

– إللى متجوزة راجل طبعه صعب وَهي عارفة كدة ، 

وَمتأقلمة معاه علشان ولادها وَبيتها .. مش منتظرة من حضرتك تقوليلها يا نهااارك ابيض…، أنا لو مكانك كنت سبته او خنقته او خليته أو… أو….

ـ اللي متجوز ست مش علي درجة عالية من الجمال أو اكبر أو أصغر أو حتي ليها ظروف خاصة مالكش دعوة بيهم هو سعيد بيها وهي سعيده بيه 

– إللي أولادهم مش متفوقين دراسياً مش محتاجين من سيادتك انك تتباهي بأمجاد ولادك ، وَتتريق عليهم .

– الناس إللي بتشتغل فى مكان عشان ضيقة الحال ، وَماَعندهاش مكان تانى تشتغل فيه ومالهاش مصدر رزق غير ده ، مش لازم تجرحهم بكلامك وتقول ايه المكان إللي بتشتغلوا فيه دة ، أنا استحالة ارضى بالشغلة دي .

 في ناس بيبقوا عندهم قدرة على التأقلم ، وَالتعايش وَالتغافل ….

فى ناس بيرمّوا همومهم على الله وَبيفرحوا بربع الكأس المليان علشان ماعندهمش بديل للتغيير.

سيبو الناس فى حالها ، وَمتقلبوش عليهم المواجع و تخلوهم يكرهوا عيشتهم وحياتهم ..

و ماتحكموش علي ظروف حد وانتم ظروفكم مختلفه عنهم ..

حطو فلتر علي الكلام قبل ماتقولوه..

حلّو الدنيا فى عيون إللى حواليكم علشان ربنا يحلّي أيامكم

دكتورة لبني يونس