هاني فاروق: حكيم علّمني يعني إيه غُنا.. و”برافو عليك” كانت وش السعد
أجرى الحوار: [ ]
في حوار خاص مع المطرب والملحن والموزع الموسيقي هاني فاروق، فتح قلبه ل، وكشف عن بداياته الفنية، وتأثير الفنان حكيم عليه، وسر انتشار أغنية “برافو عليك”، ورأيه الصريح في حال الأغنية الشعبية حاليًا، وطموحاته القادمة. إليكم نص الحوار:
س: عرفنا بنفسك؟
هاني فاروق: أنا هاني فاروق، مطرب وملحن وموزع موسيقي. بحب الفن من زمان، وبدأت مشواري في وقت كنت فيه بدوّر على نفسي، والحمد لله قدرت أثبت وجودي بالصوت والإحساس.
س: مين أكتر حد كان ليه تأثير عليك فنيًا؟
هاني فاروق: أكتر حد أثّر فيّ هو الفنان الكبير حكيم. اشتغلت معاه في بدايتي، وعلّمني يعني إيه واقفة مسرح، وإزاي تتعامل مع جمهور، وإزاي تطلع تغني لايف من غير ما تخاف. بصراحة، حكيم كان سبب كبير في تكوين شخصيتي الفنية.
س: إمتى الناس بدأت تعرفك؟
هاني فاروق: الناس بدأت تعرفني من خلال أغنية “برافو عليك”، الأغنية دي نجحت جدًا، وكانت سبب انتشاري. من وقتها وأنا بحاول أقدم حاجة مختلفة، تكون قريبة من الناس وتحسسهم إن في صوت بيغني ليهم.
س: بتحب تغني أي نوع من الأغاني؟
هاني فاروق: أنا بحب الأغنية الشعبية، بس الشعبية اللي فيها إحساس وكلمة حلوة. مش الشعبي اللي بقى كله هزار وكلام مالوش معنى. بحاول أرجّع الطعم اللي الناس كانت بتحبه زمان، اللي فيه قصة ودراما ووجع وفرح.
س: شايف إن الأغنية الشعبية اتغيّرت؟
هاني فاروق: طبعًا اتغيّرت، وبقت في حتة تانية خالص. دلوقتي في ناس بتغني شعبي وهي مش فاهمة الشعبي الحقيقي. الشعبي مش صوت عالي وخلاص، الشعبي كلمة توصل للقلب، وصوت يعبّر عن الناس. لكن رغم كده، لسه في أمل نرجّع الغُنا الشعبي لمكانه، وأنا بحاول أكون من الناس دي.
س: إيه اللي بيميزك عن باقي المطربين؟
هاني فاروق: أنا مش بشتغل علشان أركب تريند، أنا بشتغل علشان أقدّم إحساس حقيقي. كل كلمة بقولها لازم أحسها، وكل لحن بعمله لازم يعيش جوايا. بحب أقدم فن يفضل مع الناس، مش يعدي ويُنسى.
س: مين بتسمعله من المطربين حاليًا؟
هاني فاروق: بحب أسمع لكتير، لكن حكيم ليه مكانة خاصة، صوته فيه طرب وحنية، وبيعرف يوصّل الإحساس صح.
س: هل بتشتغل على حاجات جديدة؟
هاني فاروق: آه طبعًا، في أكتر من مشروع شغّال عليهم، وفيه أغنية هتنزل قريب إن شاء الله، مختلفة عن أي حاجة عملتها قبل كده. بحاول أرجّع بيها شوية من طعم الغُنا الشعبي الحقيقي.
س: بتحب تلحّن لنفسك ولا لغيرك؟
هاني فاروق: الاتنين. وأنا بلحن لنفسي بكون مرتاح أكتر، بس لما بلحن لحد تاني لازم أفهم هو بيغني إزاي، وبيحب يقول إيه. بحب الشغل اللي فيه فهم وتفاهم.
س: بتحلم بإيه؟
هاني فاروق: نفسي أسيب علامة في الغُنا الشعبي، مش لازم أبقى الأشهر، لكن أبقى المختلف اللي الناس تفتكره لما تحب تسمع حاجة من القلب
