جبل الخريف
بسأل سوال لجبل الخريف
اللي شاب قبل الأوان
ليه لسه موجود في المكان
و بعرفك انا من زمان
ما قدرتش اني استلطفك
كل اللي كانوا بينصفوك صابهم جفا
اكتر ما فيهم نسيوا ايه معني الوفا
و اللي اكتفي كان لسه مستني الربيع
خليك جرئ و ازعق بصوتك للجميع
إن الفصول الأربعة صبحت خريف
و ان عكازك بيزحف بالكهولة
و ما عادش في دنية طفولة
و ما عادش فيه صلة الرحم
كل اللي فيهم إختَصَم
كل اللي فيهم في المشاعر
أبكم ، أو ، أصم
و الهجر خد دور البطولة
جف الشجر و بيحتضر
ما بقاش يداعب في الرياح ،
و الذكريات كان وقت راح
الكل عايش غربته
و البعد فرقنا بكلام
مافيهوش سماح ،،
و الكل خاف يادي الجفاف
اللي نَشِف نهر
كانت مُيِته اطعم م الخشاف ،
يادي الجفاف اللي حَل علي الجميع
و كتير يبيع العشرة ف سوق
و الكل شاف يادي الجفاف ،
اللي خلي ضحكة القلب البريئة
سلعة تتباع في المصانع
و اللي مانع شكله خاف
شعور غريب
انك تعاتب في النصيب
و انك تطلع نفسك مكتوف الأدين
تكتب في قصة و النهاية ما بين و بين
جبل الخريف جواك و انت الغريق
و الدنيا مش شايفاك فوق الطريق
رامي الحمول ع الغير و ناسي بلوتك
أما الحقيقة في سكتك ،ما انتاش برئ ،
******************
ياسر عبد الحميد
*****************
