بنتكلم انا وواحدة صحبتي ازاى كل منا بيحب يكلم ربنا وازاي أن سهل اوي انك تنادي ع ربنا عز وجل وهو يسمعك بسرعه من غير روتين اوتعقيد…. وقالت لي انا مش شرط اكلم ربنا بالقرأن أو اي دين ولكن انا بقول لربنا يا رب طبطب عليا اسندني انا تعبانه اقف جنبي بكلمات بسيطه بدون تعقيد ولا واسطه ولا حضرتك ولا سيادتك بخبط عليه يفتح لي بابه….. رديت عليها فكرتيني بفيلم رابعة العدوية ازاي كانت كل يوم تناجي ربنا وتنادي عليه وتناديه بحبيبي وتقول له كل اللي في نفسها ببساطه ويسر بدون ترتيب للكلام وبدون حفظ ايات قران…. كانت تخلو اليه في الليل تناجيه وتناديه وتطلب منه المحبة والعفو والمغفرة بأسلوب رائع …… قفلت معاها التليفون واعدت افكر يا ترى هو ينفع اكلم ربنا من غير ما أقدس واسبح وأعظم لانه أهل لذلك الواحد يخجل يكلم ربنا عز وجل بدون ما يصلي ويسلم ع النبي ويمدح في ذات الله العليا ويستغفر الله…. قلت اجرب اعمل كده وقبل ما ادخل التجربة افتكرت أن سيدنا محمد صلي الله عليه وسلم قبل ما تنزل عليه الرسالة وقبل الوحي فضل يتعبد اربعين سنه في غار حراء ينعزل عن الناس في شهر رمضان …..طيب يا ترى كان بيقول لربنا ايه وبيعمل ايه وهو مش عنده منهج أو كتاب أو دين يسير ع نهجه….. اكيد كان بيتعبد بالنظر الي السماء وما فيها والأرض وما عليها والكون وما يحوى…… وافتكرت لما قالوا لنا في المدرسة واحنا صغيرين أن التفكر في خلق الله عباده والنظرللسماء دون أن يتكلم اللسان عباده وخشوع القلب لله دون تلفظ عباده….. فقررت اخوض تجربة الكلام مع ربنا بدون ترتيب كلمات وقلت لربنا كل حاجه مضيقاني وكمان شكرته ع كل حاجه أداها لي دون حول مني ولا قوة وطلبت منه أنه يكون معايا وما يخلنيش اغلط في قراراتي أو أحيد عن الطريق الصواب…… أعدت مع نفسي أعدت عرب احل مشاكلي معاها ادام ربنا ….. خرجت من الجلسة دي واحدة تانية…. خرجت منها وانا مش حاسة لا بتعب بدني ولا روحي ولا نفسي…… ساعتها افتكرت صحبتي ودعيت لها انها تكون معايا في الجنة لأنها علمتني حاجه كنت اخجل اعملها وكنت شايفه أنه ما يصحش اتكلم مع ربنا لانه كده كده عارف وشايف وسامع….. قلت انزل لكم تجربتي لعل وعسى تجدوا فيها المتعه الحقيقية اللي ممكن تزيل عنكم المرض والفقر والزعل والكسل….. بشوف كتير بوستات ع جروبات أصحابها داخلين في حالة اكتئاب وأمراض نفسية….. وداخلين يقولوا أنهم تعبوا من الدنيا ومن الناس ومن الفقر ومن التنمر لدرجة أن وصل الحال أن في ام بتهدد بالانتحار عشان ولا دها اشقية وما حدش من أهلها طايقهم…… العلاج بسيط اوي روحوا لربنا بليل وكل الناس نايمه وغفلانه خليكوا انتوا صحيين وكلموه ببساطه وقولوا له يا رب طبطب علينا وامسح علي قلوبنا بالماء والثلج والبرد…. العلاج مجاني والروشته سهله والطبيب فاتح أربعة وعشرين ساعة ورفد كل الموظفين اللي عنده عشان ما حدش يوقفكم ع بابه ولا يزعلكم ولا يحرجكم الفقير يطلب مال وذهب ربنا خيره كتير ولا يعجزه شئ وخزائنه مليانه ولو اداكم تقلكم دهب لن ينقص شئ من ملكه ولو قدر انمله ….. ولو زعلانين كلموه يفرحكم ويملي قلوبكم رضي الفرح عند ربنا ومنه…… المظلوم يرفع أوراقه للسما القاضي عادل وحكمه في جلسه واحده….. لو مبسوطين كلموه يديم عليكم الانبساط واشكروه عشان يزدكم…..
ربنا جميل اوي وقريب جدا وبلاش الواسطة اللي للعباد لان العباد بتزهق من اي حد يطلب منهم خدمه ولكن ربنا طول الوقت قاعد مستنينا نطلب عشان يدينا هو اصلا عاوز يدينا….. يلا اتوضوا وصلوا وقولوا يا رب ….. يا رب….. يا رب…..
