طيب حضرتك شايف أن المعايير دي مناسبة لنائب برلماني ولا حضرتك تقصد عريس متقدم لبنت اختك
الراجل الجميل الخدوم الواجهة ابن العيلة ده فاهم ايه هو دور نائب البرلمان وايه المطلوب منه يعني بيفهم في التشريع مثلا عنده فكرة عن الاقتصاد والموازنة ومعدلات التنمية والمشاكل العامة اللي دايرته على الأقل بتعانيها وعنده رؤية معينة لمحاولة حل أو حتى وضع خطة تتناسب مع الإمكانات المتاحة لمحاولة حل المشاكل دي طيب البيه القمور ده اللي عايز يبقى نائب يمثلك وينقل همومك ويحاول يحل مشاكلك ويبقى ذو دور فاعل في رفع مستوى معيشتك والخدمات الصحية والتعليمية اللي حضرتك محتاجها انت شايف أنه عنده رغبة فعلا إنه يعمل كدة ولا هو بيكمل وجاهته الاجتماعية و بيتمم مصالحه الشخصية من خلال البرلمان على قفا حضرتك بس ، راجع السنين اللي عدت عشان تعرف المعايير الصح اللي تختار على أساسها ده لو حضرتك عايز حياة كريمة فعلا يعني مش مجرد تطبيل على حساب مصلحتك.
فكر كويس هل انت كمواطن لك مطالب لو لجأت لمن تنتخبه هيفتحلك بابه وهيستقبلك ويسمع مطالبك ام ستصدم
هل تعاون معك هذا الشخص من قبل ام وعدك بوعود كاذبه حفاظا علي ماء وجهه
هل سيرته الذاتيه تؤهله ليمثلك تحت قبه البرلمان
هل هو قادر علي مناقشه سلبيات تلمسها انت ومن مثلك وقادر علي حلها
هل لديه الوعي السياسي الذي يؤهله لهذا الشرف الوطني ام صاحب مصالح وسيرعي مصالحه فقط
اعرف ان مش كل من حضر تعازي ولا حضر فرح ولا طهور يبقي نائب
النائب خدوم من بدايه حياته لانه اتربي علي خدمه الناس واتزرع في عائله معروفه بخدماتها حتي ولو علي حساب نفسه
وونصيحه متنتخبش مرشح الا ولديه برنامج انتخابي تلاقي فيه حل ل 5 في الميه من مشاكلك لان مفيش نائب لديه القدره علي حل 10في الميه من مشاكلك
ابتعد تماما عن اصحاب المال السياسي
صاحب الكرتونه والبون ده بيشتريك بفلوسه متقدرش تحط صباعك في عينه لو منفذلكش طلبك صدقني كمان معني انه بيشتريك بفلوسه ده بيبقي نقص جواه في حاجات كتير منها انه فاهم كويس ان مالوش شعبيه ولا له ارضيه ولا له معارف وليس معروف بثقه الناس فيه فبيعوض ده بأنه يشتريك بفلوسه
ولا عزاء لاصحاب المصالح لان كلهم معروفين لدي الجميع والسيره الذاتيه اسرع من البرق لكل مرشح
فبلاش تحطوا دماغكم في الرمل وتقولوا منعرفش او مخدناش بالنا
الكل عارف مين خدم وبيخدم وله علاقات ومحبوب ومين استغل وهيستغل مكانه بالبرلمان لمصلحته الشخصيه.
