خواطر وأشعار
آه م الناس.. (أغنية)
آه م الناس..
(أغنية)
بقلم الشاعر المبدع: سعد الشرقاوي
من كتر الناس اللى بميت وش
وحشونا الناس اللي بوشّين
والليّ اتعوّد انـّه يغش
باع العشرة عشان قرشين
عيب الناس المرّه يا دنيا
لمّا يخونوا العهد ف ثانيه؟
واللا نصيب الناس التانية؟
واللا دا عيب الزمن الشين؟
,,,,
راحوا الناس الليّ اتعودنا
نعيش الزمن الحلو معاهم
والليّ وجودهم كان يسعدنا
ويمسح دمع الحزن لقاهم
عيشنا وشوفنا كتير بعديهم
تبقى حبيبهم لو تدّيهم
والمطلوب انـّك تراعيهم
مهما يكون تعبك فى رضاهم
,,,
مش ح اتغيّر ابدا عمري
مهما اتغيّر أيْ أساس
عهد وماشي عليه من صغري
عمري ما اتاجر بالاحساس
ح اصبر لمّا ألاقي صحابي
الليّ قلوبهم على طبطابي
يمكن أفضل بعد غيابي
دعوة خير فى قلوب الناس
