{ صباح الخير يا مصر }
{ صباح الخير يا مصر }
للشاعر // سعيد حسان
صباح الخير يا وش الخير يا نسمة صيف على قلوبنا بتروينا
صباح النور على البنور يا شمعة قايدة لولادنا بتهدينا
صباح الفل يا ام الكل فين إنتي تعالي قوام وغطينا
صباح الحب يا بلادي رجعنا لك بكل الشوق تقابلينا
صباح الورد يا وردة هنا شاردة مع الياسمين بتشفينا
صباح السعد يا ام السعد في قلوبنا ومين قالك هتنسينا
صباح النور يا ست الحور صباحك حلم بيحقق ٱمانينا
صباح نعمة صباح رحمة من الرحمن في كل صباح يواسينا
واقولك إيه ؟! واعيد لك إيه ؟! صباحك بدر بينور ليالينا
وٱجمل يوم ٱقوم م النوم وانا صاحي علي صوتك ينادينا
عشان ٱرضك عشان عرضك وبعيالنا حنهديك وتهدينا
يامصر النيل مع المواويل سمعتينا نغني بشوق ٱغانينا
وحطمنا جدار الخوف وبكرة تشوف هنكسر إيد ٱعادينا
ولو جه غول نقوم على طول نقدم روحنا قدامك وبإدينا
ورجالة كتير جايين ٱلوف ملايين عشان بنحب بعضينا
دا ٱبسط شيء يكون ليكي عشان نرضيكي يا ٱمي وترضينا
و زي زمان بنيتي حضارة الإنسان ولسة كمان هتبنينا
نعاهدك والضمان غالي ٱنا ومالي نرجع مجد ماضينا
نغنيلك ونحكيلك ٱمانينا هنا عاش الملك مينا
ونحكي لمين ؟! دا مينا موحد القطرين و بيحرر ٱراضينا
وبعد سنين انين تلاتين قالو لنا مصر ٱهي ماتت وجاية الناس تعزينا
تموت إزاي وٱنا فيها ؟! وهي حياتنا وهوانا وروحنا اللي بتحيينا
بقالنا زمان ما حدش كان يفكر إنه راح يسمع كلام لينا
ولما نادينا بالتغيير وقومنا في ميدان تحرير وكبرنا وصلينا
وقف كل الزمان لينا. وصورنا عشان ييجي يحيينا
ونمنا في الميدان بالدور وصوت عصفور مع الٱنوار يصحينا
صباح نادي يطبطب على القلوب بدري وبينادي بصوت هادي يهدينا
صباح خللا الجميع يشهد بوحدتنا ومش هنعيش لوحدينا
صباح ورانا عبد الله ٱبو الجدعان بكل ٱمان واخد بإدين ٱبو مينا
صباح لونك على توبك يهفهف لاجل يعشقنا و يغرينا
يامصر النصر يا غالية يابانية الف قصر وقصر لبينا
ونادي علينا من تاني هاقولها لك منين ما تروحي ودينا
هنبنيلك مصانعنا وحنعمر مزارعنا وحنخضر صحارينا
وحنعللى مدارسنا ونرفع في السما راسنا ونخدك جوة ف عينينا
ما عادش خلاص هنسمع دي دواعي الٱمن والباشا اللي كاوينا
وفوت بكرة وروح يا اسطى وهات واسطة وانا مطنش وفاض بينا
وقوم خلص وهتعدي وتحيا مصر كله تمام يا فندينا
وفوتلي ويللا شيل وشيللي ولا يهمك ده مصر بخير على إدينا
وهي جوة خربانة بتتدمر وبتخلص على إديهم وتدينا
عرفتو إزاي بترضينا وبنقصر ونتحسر وهي كل ما لينا
يا مصر يا ساكنة جوانا ظلمناك كثير والله ٱرجوك تسامحينا
دي غلطة ومش هتتكرر وانا معاكي تعالي بسرعة ضمينا ولمينا
وقومي الصبح و اتوضى وصلي ركعتين لله عشان ربك ينجينا
وصلي معانا ع الهادي بنظرة منه تروينا وتهدينا وتكفينا
{ صباح الخير يا مصر }
للشاعر // سعيد حسان
