بينا إيه

..

عاطف كبارة

بينا إيه…

فهميني لو عرفتي

بينا إيه؟؟

العيون بتقول كلام

والشفايف بتداريها

والإيدين وقت السلام

تخفي رعشتها اللي بيها

قلبي فاهم ولا واهم

هو شايف أيوه عارف

بس خايف

إنه ممكن

يتصدم أو يتهدم

إنه ممكن

يكسرك أو يخسرك

إحنا بينا سور وحد

ولا انا مش زي عندك

أي حد

لأ بجد

فهميني

بينا إيه..؟؟

نفسي أكون لك

عايز أقولك

إني حاسس باللي عندك

بس عندي قد عندك

مين يقول مين يبتدي

مين للشجاعة يهتدي

خايفة ليه بتترددي

قلبك سيبيه

يقول اللي بيه

بينا إيه..؟؟

غيبتي عني باليومين

رحت عندك مستخبي

جيت أقولك كلمتين

ماتغيبيش وتسيبي قلبي

ليه تخبي يالا لبي

صوت لحبي

قولي إمتى حتسمعيه

بينا إيه..؟؟

جيت النهاردة أسألك

يا أحتل قلبك وأمتلك

يا إما تمشي وتسيبيني

تودعيني

لاقيتك إنتي بتسبقيني

بتسأليني…

بينا إيه..؟؟

أعمل إيه…….

عاطف كبارة