وظلمنا قانون الغابة

د/عبير منطاش

قانون الغابة طول عمره بيضرب بيه المثل في الظلم والاستبداد والقسوة بين البشر.

مع إن قانون الغابة منذ الخلق واحد لم يتغير ولم تعترض عليه الحيوانات في الغابة.

معملوش ثورة عليه أو تمردوا على قوانينه!!!
ربنا خلقهم كده بهذه الصفات وهذه القوانين.

قوانين واضحة وصريحة مفيش فيها تلاعب أو تحايل عمرك شوفت في يوم أسد مثلا يعمل نفسه أرنب علشان مصلحة عايزها.

عمرك شوفت ثعلب مثل إنه قطة وديعة، شوفت في يوم قرد عايز يكون نمر، ولاشوفت غزال غدر بغزال؛ علشان طمعان في رزقه.

عمرك ما هتشوف الحاجات دى في الحيوانات
عمرك ما هتشوف التحايل والكذب والغدر بينهم.

بالعكس بنشوف حيوانات بيضرب بيها المثل في الوفاء والإخلاص.

قانون الغابة قاسي على البشر لأن ربنا سبحانه وتعالى خلقنا ووضع لنا الشرائع السماوية.

وهى كلها عدل ورحمة وحب وكل الصفات والأخلاق الكريمة؛ ربنا خلقنا كده بالفطرة دي.

زاي ما خلق الحيوانات في الطبيعة بقوانين الغابة الحيوانات لم تتغير ولم تعترض على طبيعتها ولا قوانينها.

لكن البشر خالفوا طبيعتهم ومشيوا عكس قوانين البشر نسيوا فطرتهم إللي ربنا خلقهم عليها.

تركوا شرائع السماء، واتجهوا لشريعة الغاب.
وبعدين يقولك أصل إحنا عايشين بقانون الغابةياااللعجب!!!!!

مش انت يا إنسان اللي تركت شريعة السماء
و نسيت إنك إنسان ربنا خلقك وكرمك.

قال تعالى( وَلَا تَكُونُوا كَالَّذِينَ نَسُوا اللَّهَ فَأَنسَاهُمْ أَنفُسَهُمْ ۚ أُولَٰئِكَ هُمُ الْفَاسِقُونَ )

إحنا اللي نسينا فطرتنا وظلمنا أنفسنا بالبعد عن شريعة السماء؛ لكن الحيوانات في الغابة لم تنسى شريعتها.

شوفت بقى يا إنسان إنك أنت اللي ظلمت نفسك بالبعد عن طبيعتك وفطرتك وإن قانون الغابة برئ من التهمة.

عفوااا قانون الغابة فقد ظلمناك كما ظلمنا أنفسنا.