تتريق على لبسه – مش مهم عنده . تقول البنطلون بره أو جوه والشوز معرفش إيه – مش مهم عنده . تقول أمه يهودية – مش مهم عنده . تقول عليه فاشل و خربها و جوعنا – مش مهم عنده . تشتمه و تدعى عليه – مش مهم عنده . تِعَدل وتنَظَر عليه و تنتقده – مش مهم عنده . تكرهه أو تحبه – مش مهم عنده . شايفه طيب أو بيمثل الطيبة – مش مهم عنده . شايفه غشيم و هيلبسنا فى الحيط – مش مهم عنده . تِفَطَس مشاريعه القومية و مش عجباك – مش مهم عنده .
أما المهم عند السيسى بصحيح :-
إنه أنقذ ١٠٠ مليون وخلى لهم وطن كان بيضيع وبيبنيلهم دولة جديدة . يقابل ربنا نضيف ويقوله أنقذت ملايين من التشرد والنوم فى الخيام . شال شيلة تقيلة بحلوها ومرها وبالندابين والنكسجيين والثورجيين والأسوياء ومَفَرَقْش بينهم . شالها بإللى بيحبه و يكرهه . شالها بإللى واقف معاه و إللى واقف ضده .
فى النهاية إتريق براحتك هو عارف سكته ومش سامعك و لا شايفك { إن الله لا ينظر إلى صوركم } والخلاصة لا الديون بتخوف ولا سد النهضة بيخوف ولا العدو الخارجى مهما كانت قوته بيخوف وإللى يخوف بجد هو الناس إللى عايشة على أرضها وواكلة من خيرها وجاحدة الجحود ده كله لأ وكمان تضليل وتشكيك وشماتة وتكسير وفتن من إللى بيعملها فيك العدو الصريح فلو مش قادر تفيد بلدك وتدعمها ولو حتى بحرف يبقى على الأقل إختشى على دمك وإدَارى وما تبقاش طعنة صريحة فى ضهرها والحمد لله زى ما فى ناس مريضة بتسعى بشتى الطرق لهدم الدولة فى أيضاً ناس داعمة ومحبة لبلدها ومستحملة مهما كانت الظروف والضغوط .
