عروسة المولد

قصيدة

عروسة المولد

كلمات/أيمن البكري

أنا عايز أقولك كله تمام
وزي ما بصحي برضوا بنام
ومجاش ف غيابك يوم أزمه
الحزن داه كان سببه الجزمه

كانت أضيق من خلقي يوميها
وعلشان كده بكيت
مين قال إن أنا ف بعدك عني
ضعت أو إتهديت
أنا لسه أهوه بضحك وبغني
ومن ساعه ونص إتغديت

مش مضرب عن أكلي لفتره
ولا بحرق بوكس وكليبوترا
ولا ماشي بكسر ف حاجاتي
ولا همشي أصرخ ف إخواتي
من بعدك أصبحت فلاتي
وحياتي كلها بنات
وبقلب من شات لشات

فاكراني مكسور وحزين
وعروسة المولد
مش عارف أجيبها لمين
أنا عايز أقولك هنساكي
مش هسهر من بعدك باكي
وكبيرك عندي أنا كام ساعه
الدنيا مظاهر خداعه

فوعاكي تصدقي لو مره
أنا قولت كلام محصلش
علشان أظهر متماسك من بره