هنتقابل
كلمات …. أيمن البكري
هنتقابل هنتقابل
مهما تعدى أيام
وتتهدلى أحلام
مهما الدنيا تكسرنى
هنتقابل
ولو كل العالم ضدى
وفضلت أنا بس لوحدى
وكل الناس إل حواليا
أخسرهم وتخسرنى
هنتقابل هنتقابل
وهنتعاتب ونتحاسب
وهعرف عملتى فيا كده ليه
وهتدفعى تمن عمري إل ضيعتيه
وهاأخد حقى ف الآخر
مش أنا إل كنت زمان
حضن وضهر وأمان
ف عز الضعف والأحزان
ما إتخلتش يوم عنك
وأنا الدنيا بحالها سابتنى
كان ممكن أقول بناقص
منك إنتى كمان
بس إنتى عمرك عليا ما هنتى
هانت ليه عليكى العيله والمه
وكل لحظة حب وحضن وضمه
وأنا ف أصعب ظروف
والدنيا ف عنيا سوده وضلمه
دوستى عليا ذيك ذى ناس كتير
فى حياتى بايعه وخاينه وظالمه
هنتقابل
وهتيجي عنيا ف عنيكي
وهشوف فيهم الحسره
والحزن والكسره
راجعه أسفه وندمانه
وحاسه أد إيه كنتى غلطانه
بتقوليلى ياريتك حافظتى علي وعدى
بتحكيلي على إل حصلك بعدى
هو داه جزاء إل باعت العشره
هنتقابل
وهتبقى دى أخر مره
وهتبقى مصممه ومصره
إنك ترجعيلى
مش هرجع لواحده باعتنى
وأنا ف أشد ازمه سابتنى
حاولت كتير اقنعك
رفضتى تسمعينى
وحياة كل لحظة جرح
وكل يوم عشتيه من غيرى فى فرح
وحياة دمع عينى
أنا دلوقت خلاص مش راجع
شبعت أحزان وخوف ومواجع
وخدت حقى لما شفت دموع عنيكى
أنا من غيرك أكيد مبصوت
وأهون عندي إنى أموت
ولا إنى ارجع ليكى
