قصيدة علي الفيس
بقلم/ أيمن البكري
علي الفيس
ناس كتير متجمعين
من الشرق ومن الجنوب
ومن الشمال ومن اليمين
علي كل شكل وكل جنس وكل لون
الندل والطيب والخاين والأمين
وإل بيدور علي بنت
يعدي بيها وردية اليل
وإل بتكلم كام واحد
في وقت واحد
وكل واحد مفهماها
إنه الوحيد إل في حياتها
وكلهم مصدقين
وإل هارينا منشورات
كلها عن تفاصيل حياته
دلوقت بشرب دلوقت بأكل
أنا قاعد أنا واقف أنا رايح
أنا جأي أنا مسافر
وإل عايش في دور مش دوره
علشان يرضي بيه غروره
وإل بيعوض نقص عنده
فبيهرب من الواقع
لعالم تاني كله وهم مالهش أخر
وإل بينتحل شخصية
ممثل ولا مطرب ولا شاعر
والمؤمن إلي بيستغله
في نشر الدعوه والمواعظ
وهتلاقي بردوا الملحد والكافر
وإل بينشر كل شئ خارج وسافل
علي الفيس
هتلاقي إل ناشر مسافر إلي العريش
وإل يستمع قصيده للهويس
وإل بيعظم في الجيش
وإل بيشتم في الرئيس
وإل بيقول بقينا
مش لاقيين حتي الرغيف
الدولار بقا سعروا نار
والجنيه مبقاش يجيب أي شئ
وإل مالوش في السياسه
مابيمشيش غير في طريق النجاسه
بنت بيضه بنت سمره
أي حاجه حلوه قمره
يبتدي معاها ب الكتابه
والكتابه تجيب مكالمه
وحده وحده تفتحله الكاميرا
إل ذي دول مش محتاجين شيطان
جوه منهم مية شيطان
علي الفيس
هتلاقي شاب عامل نفسه بنت
وبنت عامله نفسها ولد
ماسمعوش وماعرفوش
إن لعنة ربنا علي المتشبهين
من النساء ب الرجال
والمتشبهين من الرجال ب النساء
ولا إحنا بقينا في زمن الوباء
الفيس سلاح ذو حدين
هتلاقي المنحطين والسفهاء
والسافلين وأعداء الدين
وهتلاقي المحترمين والمثقفين
والمؤدبين والمتدينين
إختار طريقك وإمشي فيه
وإل هتعمله هتلاقيه………..
