لما اموت ،،
*********
في احتضاري ، كنت عارف دي النهاية
و انكساري ، اني مُفلس مش معايا
عشت عمري و كنت فاهم م البدايا
وف قت ضعفي افتكرت ،، الناس وصايا
انا لما اموت
اياكوا اسمع ليكوا صوت
انا لما اموت ،،كده من بعيد
و ف سكوت
ارموا علي قبري السلام
من قلبكم مش بالكلام
لو فيكوا قلب بيتوجع
ابقوا ،اسألوه ،
اخدتو حق وجعكوا كام
لا حد يبكي و لا حد يترحم عليا
ولا حد يتنحنح شوية
أو يبكي تمثيل ع الضحية
و يقول حرام
انا لو عليا ارجعلكم
و اقول لكم
انتوا اللي كان في نفسكم
اني ابعد عنكم ،
و اني ما اكونش ف ضلكم
المهم اني اموت و السلام
باتت حكاويكم غريبة
افعال كتير منكم مريبة
و انا عمري ما قولت العجيبة
لأن ده طبع اللئام
كل واحد ، ليه معايا ألف ذكرة
كان بتداري ، أما أقولها
دلوقت ح يعيش بإرتياح
و يقول خلاص الهم راح
رغم أنه كان يطلب سماح
و انا كنت شايفه في عيني نَكرة
كل واحد جاب في سيرتي بالضلال
و أما شافني اتجاهلني و حاله مال
انا كنت واد ابن الحلال
و ابن الحرام كسر مآدفي كلها
مش هلفطة ولا ارتجال
ماهي ناس بتشبه بعضها
انا ماشي للي ماشوفتوهوش
لدنيا ياما سمعتوا ، عنها
ناس وش واحد مش وشوش
طول عمري نفسي ابقي منها
*******************
شعر / ياسر عبد الحميد
*******************
