رسالة عن المغترب
كتب:- احمد ابوسمك – المنوفيه
اللى باصين للمغترب … احسدوه وعوضوه :
عوضوه عن أول شعره بيضه في راسه .
عوضوه عن خلعة قلبه في المكالمه بتاعة أبوك مات وخليك علشان متعملش مشاكل مع كفيلك .
● عوضوه عن النومه اللي نامها مع 10 في أوضه واحده بيعملوا حمام بالطابور .
● عوضوه طيب عن البنت اللي سافر علشان يجيب لأهلها طلباتهم ، رجع لقاها معاها عيال .
● عوضوه عن جوازه من بنت تكون مناسبه ليه مش من جيل تاني غير جيله .
● عوضوه عن حضن أمه ، عارفين معنى حضن الأم ياولاد ال %$##@ ؟!!
● عوضوه عن كرامته وعزة نفسه لما كفيله ” يقوله أنا هخليك مذلول كده وهاسيبك زى المطلقه ، جوازك في جيبي .
● عوضوه عن تغاضيه لما يبلع كذب أهله كل مايكلمهم ويقولوا إنهم كويسين .
● عوضوه عن قيمته كبني أدم متعلق بإمضاء أو ختم من كفيله .
● عوضوه عن دموعه ودموع أهله في لحظة وداع في المطار .
● عوضوه عن عرقه و تعبه وحرصه وإلتزامه .
● عوضوه عن أكله نفسه ياكلها أو لبس نضيف .
● عوضوه عن إنتظاره سنه أو سنتين علشان يعيش 20 يوم ولا شهر وسط أهله بنضافه .
● عوضوه عن مشاعره وعلاقته بأهله وصحابه ومراته وعياله اللي إتحولت إلي علاقه إليكترونيه .
● عوضوه عن قلقه لما يجيله تليفون يقولوا إبنك تعبان أو امك تعبانه أو أبوك تعبان !!
● عوضوه عن لحظة لما يجيله تليفون يقوله البقاء لله أبوك مات ، البقاء لله أمك ماتت ، شد حيلك .
● عوضوه لو عمل حادثة ومات ، إبقوا عوضوه عن جنازته اللي محضرهاش غير التسعه اللي معاه في الأوضه .
إحساسكم اللي كونتوه عن صورته لما نزل أجازه وشايل موبايل بكاميرا ولابس طقم نضيف وبيركب تاكسي مش ميكروباص .
إحساسكم دا محتاج مراجعه لصورته وشكله قبل ما ينزل بيومين .
عوضوه … أو في حاله سيبوه ….
