ضريح اشواق
في توب الملح و العشرة
دهب قشرة و سعره تراب
و منديل الهوا الطاير
بقا حايرف وسط سحاب
ما عجزنيش اشوف الشمس
ولا ،اني اغيب مع التايهين
في لحظة يأس
و اقول بكره اكيد وافد
عشان بكره وليد الامس
اروح اكسر ف حصالة ذكريات عمري
و مين يدري ، جايز فيها
بقية ڜئ من الاحلام ،،
افكر انام ،عشان احلم و اتذكر
لكن بيجيلي الف شيطان
و بستغفر و بقرا رسالة الغفران
وكام صورة من القرآن
و عدية ياسين بعديه ،
يرجعني الزمن بيا ،
بكل آسية كانت فيه
اشوف الدمع في عينيا
و جرحي اللي حاولت اداريه
و أقرب من ملامحي كتير
الاقي السر مرمي في بير
و سور حلمي اللي كان باقي
بناله ضريح ، لاشواقي
و احلامي اللي عايشة معاه
بقت صورة لكهل كسيح
شبع منه الزمن و رماه
