ماهى الكلمات اللي ختم بيها دونالد ترامب بارك الله في الشرق الأوسط، بارك الله في إســـرائيل، بارك الله في أمريكا.”
كتب يحي الداخلى
دي الكلمات اللي ختم بيها دونالد ترامب خطابه الموجّه للشعب الأميركي والجمهور الإســـرائيلي، واللي أعلن فيه دخول بلاده الحــرب رسمياً الليلة اللي فاتت واحنا نايمين، ومشاركة القوات الأميركية في قصف تلات مواقع نووية إيرانية، هي عصب واساس البرنامج النووي الايراني.
القصف الامريكي استخدم فيه ست قاذفات من طراز B-2 أسقطت 12 قنبلة خارقة للتحصينات، وزن كل واحدة منها حوالي ١٤ طن على موقع فوردو النووي.
ده غير الغواصات الأميركية اللي اطلقت 30 صاروخ توماهوك باتجاه مفاعلي أصفهان ونطنز النوويين.
وواحدة من قاذفات B-2 رمت قنبلتين خارقتين للتحصينات على منشأة نطنز النووية.
طب ايه نتيجة اللي حصل؟
لحد اللحظة، تعتيم كبير من إيران ومحدش يعرف مدى تأثير الضربة الأميركية وهل القنابل قدرت فعلاً تخترق التحصينات وتدمر المفاعلات النووية ولا لا فلحد دلوقتي مفيش أي تسرب إشعاعي، ولا أي خطر ذرى، ولا اي تأثيرات حسية مادية تدل على انفجارات للمفاعلات النووية الايرانية، ففي الغالب الضربة موصلتش للمشروع النووي الإيراني ولا أجهزة التخصيب ولا اليورانيوم المخصب.. وانباء عن ان إيران نقلت كل الحاجة المهمة من المواقع دي من زمان عشان تحميها من الخطر الامريكي غير انها في تحصينات شديدة تحت الارض بألف متر..
لآن لو نجحت الضربة دي في تحقيق اهدافها هتكون ايران خسرت 500 مليار دولار تكلفة برنامجها النووي اللي حاولت بنائه خلال 45 سنة استحملت فيهم وفق تأثيرات العقوبات والعزلة والمقاطعة الغربية والعالمية. ويكون تم تدمير البرنامج ده بست قنابل خارقة للتحصينات تكلفتها الإجمالية 2.4 مليار دولار بس!
طب ايه النتائج المترتبة على اللي حصل ده سواء نجح او فشل في تحقيق هدفه.
أولا: كدة الولايات المتحدة دخلت الحرب رسميا، وبالتالي صارت مواقعها ومصالحها في المنطقة والعالم أهداف لإيران وحلفائها من اللحظة دي ، فهل هتستحمل امريكا اللي مقدرتش تصد على هجمات الحوثيين وجريت تعمل معاهم إتفاق.
ثانياً مؤكد هيرد الإيرانيين على القواعد الامريكية في الخليج وبعض الدول المجاورة زي ما وعدوا، وزي ما هدد الحوثيين امبارح ولمح بكدة الحزب امبارح انه هيتدخل في الصراع هو كمان غير الدعم من تحت لتحت اللي هتاخده من روسيا والصين وكوريا الشمالية لانها حرب نفوذ غير مباشرة بين المعسكر الغربي والشرقي.. ده غير التهديد بغلق مضيق باب المندب من الحوثيين ومضيق هرمز من الإيرانيين وتبقي خراب على الكل عشان كدة كان اول تصريح للمعتوه ترامب كلب النتن ياهو ودلدوله قال فيه:
أي رد من إيران ضد أمريكا سيقابل بقوة أكبر بكثير مما شهدناه الليلة. شكراً! دونالد جون ترامب، رئيس الولايات المتحدة الأمريكية.
فهنشوف الفترة الجاية ايه اللي هيحصل هل إيران هتدخل بتقلها لا فيها لاخفيها ولا هترد رد صوري حفظ ماء الوجه وترضخ وتتفاوض وينتهي الحلم الإيراني للابد ولا الايام الجاية مخبيالنا ما هو يفوق توقعاتنا.
اخر حاجة وهي مش تنظير ع حد ولا ادعاء علم بس الحمد لله في مقالين اليومين اللي فاتوا توقعت الضربة الامريكية دي مش بكلام عايم لا بتحليل لاخبار رسمية عن تحركات عسكرية في المنطقة بغض النظر عن التصريحات الرسمية المخادغة لترامب بانه لسة قدامه اسبوعين على بال ما ياخد قرار ولما اتسأل انهاردة ده معداش غير يومين بس قالك اليومين دول تبع الاسبوعين اللي حددتهم 😀
