ما إنتاش ممثل
************
دور المبادئ وسطهم
راح يبقا ، فاشل جانبهم
و ان قولت تبقي ف ضلهم
الشمس راح تنقح دماغك
و تعيش بتلعن ألف داغك
فتلاقي ضلك راح بعيد
بين العبيد ، و يقولولك ده مكانك
أما عنك ح تلاقي واحد صورة منك
بيبصلك عاوز يقوللك
ف كلام كأنه بيحكي عنك
اسمعها يا ابني ، وخدها مني
حكمة حياه ،،
انا قبل منك حد تاه
واصل طريقه لمنتهاه
و ف يوم ما فكر في النجاه ،،
ضل الطريق منه ف خطاه
وإن كنت قادر انك تمثل ع البلاط
جانبك ملوك ، عمرهم ما ح يرفعوك
مش ح يسيبوك ولا يرحموك
ولا حيسيبولك، لو فتات
انا عُمر فات ، كنت بتفرج عليهم
بس عمري ما كنت منهم ولا ليهم
بسكت ساعات و اتسلي بيهم
انا حد جالكوا ، من زمن سكات
انا دمعة نزلت من عنيهم
ما فكروش إن بإديهم يمسحوها
أنا ضحكة خارجة مني ومسخوها
و كأنهم ،في الامنيات بيعذبوك ،،
ايه يعني معني، انك
تشتريهم و يبيعوك
ايه يعني معني كلمة
بتحاول تقولها يكدروك
و تروح تقدم في انتسابهم
تلقي جانبهم يرفضوك
و المسرحية فصولها باتت هيه هيه
أبطالها من زمان طوائف نرجسية
و بيدعوا ، أن هما أنصار القضية
ف ما تدعيش انك ممثل
وسط ناس بيمثلوا
قبلك كتير اتحملوا ،
و غيرهم كتير شافوا الخلايق
بيمثلوا ، و ما سقفوش ،
و العرض ساري ، للي كانوا
في عرض تاني ما يعرفوش
دي المسرحية ياما فيها
و فصولها لسه بنبتديها
و الشخصيات ماضيين عليها
ناس غاوية تغيير,, الوشوش
*******************
شعر / ياسر عبد الحميد
*******************
