” رسالة وطن “
الشاعر/خالد فضل
يامصرى يابن البلد
واجدع ولد
وشايل هموم البلد
من يوم مااتولد
فاضلنا تكه
على بر الأمان
مكتوبلنا سِكه
وزمان ومكان
مكتوبلنا نصبر مع الأيام
مكتوبلنا نمشى مع الأحلام
لجل مانعدى الطريق بسلام
ونبطل سوا كل الكلام
والخوض مع الأوهام
وتعجب وراه إستفهام
ولا إمتى وليه وإزاى ؟
قوول اللى واجعك
إشكى مواجعك
بس بمحبه
زعق وقوول جاى
وابكى كمان حبه
وإياك تقول ياخراب
بلدنا مش ناقصه
خليها واقفه وخلاص
دى حكمه ليك خالصه
البيت من غير رجال
تلقى العيال هايصه
وحتى البنات مايصه
حافظ على وطنك
دا الخلق من غير وطن
فى كل البلاد لايصه
