⏬️ محمود عبدالعزيز اتجوز بوسي شلبي يوم 9 يوليو سنة 98.. والجواز كان رسمي بمأذون.
كتب يحي الداخلى
⏬️ بعد شهر، حصلت بينهم خلافات وسابت البيت، وقرأت إن محمود طلقها، لكن لما واجهته أنكر، واتصالحوا ورجعها تاني بيته يوم 16 سبتمبر 98.
⏬️ طبعًا كانت لسه في فترة العدة، فحتى لو كان طلقها فعلًا، فعادي وشرعي يرجّعها من غير ما يكتب عليها من جديد، وعاشت بوسي معاه من ساعتها لحد ما مات سنة 2016.
⏬️ بوسي احتاجت تروح تغيّر بطاقتها من “متزوجة” لـ”أرملة”، ويمكن ناس كتير تتفاجأ إنها كانت لسه كل ده ما غيّرتش البطاقة، بس ده اللي حصل، وغالبًا تغيير البطاقة احتاجته بسبب صراع على قطعة أرض ورث.
⏬️ اتفاجئت بموظف الأحوال المدنية بيقولها إنها مطلقة مش أرملة، واكتشفت بالفعل ورقة طلاق غيابي طلقة أولى رجعية.
⏬️ الطلقة الأولى الرجعية معناها إن الزوج طلّق زوجته، لكن الطلاق مش نهائي، ومن حقه يراجعها في فترة العدة من غير عقد أو مهر جديد.
⏬️ بوسي عملت بلاغ ضد المأذون اللي عمل الطلاق، واتهمته بالتزوير.. لكن الراجل ميت أصلًا، وكمان الطب الشرعي أثبت إن توقيع محمود عبد العزيز صحيح ومش مزوَّر.. ونفس التوقيع اللي على عقد الجواز هو اللي على ورقة الطلاق.
⏬️ بوسي رفعت دعوى اسمها “دعوى إثبات مراجعة الزوجة” ضد ولاد محمود عبد العزيز، وطلبت تصحيح بياناتها في مصلحة الأحوال المدنية لأرملة بدل مطلقة.. واللي الناس ما تعرفوش إن كل القضايا دي بقالها سنتين وأكتر في المحاكم، بس الموضوع لسه معروف دلوقتي.
⏬️ المحكمة رفضت الدعوى بوسي عشان الورق فعلاً بيقول إن محمود عبد العزيز طلّقها. وكمان المحكمة قالت إن بوسي أكيد عارفة بالطلاق من القيد العائلي وإعلام الوراثة، وإيه اللي سكتها طول الفترة دي؟
⏬️ بعدين عملت استئناف، وجابت شهود إن جوزها عمل حفلة بعد رجوعهم وبلّغ الحضور كلهم إنه رجّعها، وإن الطلاق إشاعة وتاني مرة المحكمة بترفض.
⏬️ عملت التماس، بيشير لاتهام محمود عبد العزيز وولاده بالغش، وإنهم أخفوا عنها موضوع الطلاق الرجعي قدّام المأذون بتاريخ 28 أغسطس سنة 98، وقدّمت للمحكمة تسجيلات بصوت كريم ومحمد محمود عبد العزيز وهما بيقولوا عنها “مرات أبويا”، لكن اترفض.
⏬️ بوسي لسه شغّالة في المحاكم، لكن ولاد محمود عبد العزيز قرروا يردوا، وعملوا ضدها بلاغ سب وقذف وتشهير بأبوهم وبالأسرة، غير البيان اللي نشروه.
إذن الأكيد أن فيه طلاق وقع، لكن محمود عبدالعزيز رجعها تاني.. لكن هل كان لازم يعقد عليها مرة تانية طالما طلقها أدام مأذون؟.. ده اللي يجاوب عليه رجال القانون.. واللي يقول إننا محتاجين فعلًا نتحرك بجدية ف ملف توثيق الطلاق وبمعرفة الطرفين.
